NDANI YA KISIWA CHA FALKLAND

NA ALBANO MIDELO, LITUHI

HIKI ni kisiwa kidogo cha Falkland ambacho kipo kwenye maingilio ya Mto Ruhuhu katika Ziwa Nyasa.Kisiwa hiki kinamilikiwa na wavuvi toka Ludewa mkoani Njombe na Nyasa mkoani Ruvuma.

Asili ya kisiwa hiki kuitwa Falkland ni mgogoro wa kugombania kisiwa hicho uliotokea mwaka 1982 kati ya wavuvi wa Ngelenge wilayani Ludewa wakati huo mkoa wa Iringa hivi sasa Mkoa wa Njombe na wavuvi wa Lituhi wakati huo wilaya ya Mbinga ambapo sasa ni wilaya ya Nyasa mkoani Ruvuma.

Kwa mujibu wa historia ya mgogoro toka kwa Vikta Komba aliyekuwa kipindi hicho,wavuvi wa pande zote walikuwa wanadai kisiwa hicho ni mali yao.Hata hivyo historia inaonesha kuwa Aprili 2,1982 hadi Juni 14,1982 ulizuka mgogoro wa kugombania visiwa vya Falkland vilivyopo katika bahari ya Antlantiki kati ya nchi ya Uingereza na Agentina kila nchi ikidai kuwa kisiwa hicho ni miliki yao.

Wakati mgogoro wa visiwa vya Falkland nchini Uingereza unaendelea pia katika ziwa Nyasa kwenye maingiliano ya Mto Ruhuhu, mgogoro wa kugombania kisiwa uliendelea ndipo kisiwa hicho kilipewa jina la Falkland ambalo linaendelea hadi leo.

 Eneo hili linatajwa kuwa na utajiri wa samaki wakubwa na watamu wakiwemo mbasa,ngumbo,mbufu,masangalafu na mbelele.Anayejua zaidi historia ya Falkland Nyasa, nafasi ipo wazi kutujuza.