NA.HONORIUS
MPANGALA
KWANZA kabisa nianze na kukusalimia shikamoo
mheshimiwa Rais wangu, Dk. John Pombe Magufuli. Najua hii kazi ni ngumu kama
usemavyo wewe mwenyewe lakini sina budi kukuombea uione nyepesi ili uweze
kupata nguvu ya kututumikia vyema kama yalivyokuwa malengo yako siku unaenda
kuchukua fomu ya kugombea nafasi hiyo.
Mheshimiwa nikiwa safarini kuelekea makao makuu
ya nchi yetu Dodoma, katika gari nilipata tafakuri ambayo ilinifanya
nitoe kitabu changu cha kuandika kumbukumbu na kuhifadhi mawazo yangu ambayo
nimeona nikuandikie.
Hoja yangu kubwa ambayo ilikuwa ikizunguka katika
kichwa changu ni ile niliyokumbuka kauli yako ya kupiga marufuku wananchi
kuchangishwa mchango wowote katika shule za serikali.
Hii ilikuwa baada ya kukaa na waziri wa elimu,
sayansi na teknolojia, Profesa Joyce Ndalichako pamoja na Waziri wa Ofisi ya Rais
Tamisemi, Selemani
Jaffo. Siku zote kauli ya rais ni kauli ya serikali. Hivyo hata kilichotamkwa
binafsi nilikipata kwa sura ya kauli ya serikali.
Rais wangu, tangu zamani katika makuzi ya
watanzania nyakati hizo wakiitwa watanganyika walikuwa watu waliokuwa wanafuata
misingi ya kijamaa. Misingi ambayo rais mwenzako wa awamu ya kwanza mheshimiwa
Mwalimu Nyerere aliifuata Azimio la Arusha lililofanyika mnamo mwaka 1967
lilikuwa na kauli mbiu ya “Siasa ya Ujamaa na Kujitegemea.”
Katika hali ya kawaida mheshimiwa rais kila
mtanzania anaweza kutambua maana ya ujamaa na kujitegemea vyema kabisa. Kama
inavyofahamika ujamaa ni hali ya kuwa pamoja kwa kujaliana na kuthaminia kwa
kiwango kinacholingana kwa kila binadamu lakini pia,kujitegemea ni hali ya mtu
kuweza kumudu kujitafutia riziki kwa kutumia maarifa yake na kuishi. Yawezekana
nikawa sio mtaalamu wa kutoa maana ya siasa lakini kwa mazingira ya azimio la Arusha
ilihitaji siasa itakayokuwa ikifanyika ilenge ujamaa na kujitegemea.
Kama ilivyo kumbukumbu ya malengo ya azimio
lenyewe ambavyo ni vinne ni watu, ardhi, siasa safi na uongozi bora lakini pia
ilikuwa kupambana na ujinga, umaskini, magonjwa na dhuluma miongoni mwa raia. Katika
kupambana na ujinga elimu ilitolewa bure kwa watu wote katika ngazi zote.
Sasa mheshimiwa rais kama wananchi wako wanataka
kukusaidia kujitatulia changamoto kwa uwezo wao wakilienzi azimio la
Arusha katika kipindi hiki ambacho elimu ni bure pia kwanini ukataze? Natambua
michango inayotolewa bila hiyari ya mwananchi inakuwa kama kero, lakini wakati
mwingine yawezekana kuna muhtasari ambao unaonyesha maridhiano na makubaliano
yaliyowekwa na wananchi juu ya mchango fulani.
Mheshimiwa rais hivi umekataza hata kile ambacho kiliazimiwa
katika mkutano wa wazazi wa shule kuwa wamchangie Mwalimu Shaabani Malunde aliyehitimu Chuo Kikuu ili awafundishe masomo ya Fizikia
na Kemia wanafunzi wa Shule ya Sekondari ya Nyakitonto, iliyopo Kata ya
Nyakitonto wilaya ya Kasulu mkoani Kigoma?
Je, wale wanafunzi waliokosa mwalimu wa Fizikia, Commerce,
Book Keeping na Bailojia katika Shule ya Sekondari ya Monica Mbega iliyopo Kata
ya Mbaha, wilaya ya Nyasa mkoani Ruvuma nao wasichangishane kama muhtasari wa
makubaliano ya mkutano wa wazazi kuamua kumtafuta mwalimu wa kufundisha watoto
wao kama walivyokubaliana na bodi ya shule?
Vipi wale wanafunzi ambao wazazi wao kupitia
mkutano mkuu wa wazazi waliowaonea huruma watoto wao kwa kupoteza idadi ya
vipindi vya mchana kwa kukaa darasani wakiwa wanasinzia kwa njaa kutokana na
kutoenda kula chakula mchana kwao ni mbali au walioenda na wakapoteza vipindi
viwili kila siku.
Wazazi hao katika ajenda ya mengineyo wakasema
tunachanga mahindi Sado tatu kwa kila mwanafunzi ili wote wale chakula shuleni
nao hutaki wachangishane na wabaki wakishinda bila kula au kupoteza vipindi
ilihali ni makubaliano ya mkutano mkuu wa wazazi na wakauandikia muhtasari?
Kama itatokea wakasema wanachangishana kujenga
madarasa kutokana na watoto wao kusomea chini ya mti wa mkorosho kama ilivyo
kwa shule ya msingi Mchonda iliyopo wilaya ya Nachingwea mkoani Lindi
utawakayalia na kusema serikali italifanyia kazi na masika ndio hii watoto
wakinyeshewa mvua?.
Kwa mtazamo wangu nilifikiria ungewaachia wale
wanaofanya hayo kwa lengo kujisaidia wenyewe na watoto wao na ukapiga marufuku
ile michango iliyo ya holela isiyo na kikao chochote wala muhtasari wowote
ulioandikwa kama makubaliano ya mkutano wa wazazi. Nasema haya kwasababu hili
jambo la elimu bure ni zuri lakini kuna changamoto ambazo shule inakutana nazo.
Moja ya vitu ambavyo vimenishangaza mheshimiwa rais
ni kile kilichotokea katika Kata ya Ruaha wilaya ya Kilosa Mkoani Morogoro. Kuna
shule imekuwa ikifanya vizuri sana katika matokeo ya darasa la saba. Baada ya
wazazi kuvutiwa na hali hiyo wengi wakawa wanaenda kuwaandikisha shule watoto
wao hapo.
Kwa uwingi wa watoto ilifikia hatua shule hiyo
iwe na upungufu wa matundu ya choo. Wazazi kwa kuona umuhimu wa suala la afya
ya watoto wao wakachangishana na kutafuta mkandarasi wa kujenga choo. Mheshimiwa
baada ya tamko lako wazazi waliitwa na kurejeshewa michango yao ila sasa
kilichopo watoto wengine wanakimbia kwenda kujisaidia nyumbani kwao kutokana na
uwepo wa foleni katika vyoo vya shule.
Mheshimiwa kama tungekuwa na mawasiliano yenye
afya kati ya jamii na viongozi wa serikali za mitaa hakika naamini malalamiko
ya michango yasingekuwepo ila ni kutokana na uwepo wa kulalamikiwa kwa
watendaji wadogo katika serikali. Nasema hili kwasababu malalamiko ya jamii juu
ya watendaji yako kila eneo achilia mbali hili la wakuu wa shule za msingi na
sekondari.
Katika Kata ya Tungi mtaa wa Tubuyu Manispaa
ya Morogoro wazazi na waliamua kushirikiana kujenga vyumba vya madarasa
lakini baada ya tamko lako limesababisha hata mtendaji wa eneo hilo kusimamisha
ujenzi huo na kusema hana taarifa ya ujenzi huo hivyo upungufu huo utaendelea
katika kata hiyo.
Mheshimwa rais inatakiwa ufanye ziara bila kutoa
taarifa kwa kiongozi wako yoyote katika shule kama ya Msingi Mpopoma Kata ya
Mbaha wilaya ya Nyasa mkoani Ruvuma ukatazame kilichopo pale kuhusiana na
mazingira ya kujifunzia na kufundishia.
Pia unaweza kufanya hivyo kwenye shule ya msingi
Shishiyu Kata ya Mwatumbe wilaya ya Maswa halafu upate majibu ya watendaji wako
labda wanakuambia kila kitu kuhusu ellimu bure kiko sawa. Labda nikuambie tu
mheshimiwa rais hili jambo linaonekana kuwa kisiasa zaidi kuliko kufikia
malengo yaliyokusudiwa ya dhana ya elimu bure.
Darasa la kwanza shule ya msingi Murubanga Kata
ya Nyakitonto wilaya ya Kasulu wanafunzi 241 wanaojazana chumba kimoja chenye
idadi ya madawati 27 unaweza kujiuliza wanakaaje hao wanafunzi lakini pia
jiulize wanafundishwaje na mwalimu mmoja?
Natambua ulikuwa mwalimu lakini kuhusu changamoto
za kuhudumia hawa watoto wadogo wa madarasa kama la kwanza na la pili muulize
mama yetu Janeth Mgufuli atakueleza ukweli ulivyo.
Ni kama kila kitu mmejitwisha serikali
kukitekeleza japo yako maeneo wako wananchi wenye mitazamo tofauti wakaamua
kuchangishana ili kutatua matatizo yao. Mheshimiwa rais ziko jamii zinaweza
kukusaidia yale yaliyo ndani ya uwezo wao wakafanya jambo ambalo litakuwa
msaada kwa serikali yako.
Labda nikushike sikio ile tabia ya udanganyifu
juu ya utekelezaji wa miradi bado ipo na mifano iko mingi sana ambayo ukibaini
unaweza kusema hakuna faida ya kurasimisha madaraka.
Mheshimiwa rais sitaki kuuliza kuhusu ahadi
zako wakati wa kampeni ya milioni 50 kila kijijii, lakini naomba tu katika Shule
zote ungewaambia kama mchango umeridhiwa katika mkutano mkuu ambao mtendaji wa
kijiji anakuwa kama mjumbe na pia ni msimamizi wa shughuli za maendeleo
akimwakilisha mkurugenzi ni vyema ungeiacha tu.
Nasema ungeiacha kwasababu licha ya
kuhudumiwa na serikali lakini shule ni mali ya jamii. Maendeleo ya shule ya
sekondari Nelson Mandela Kata ya Mkambarani wilayani Morogoro yanahitaji juhudi
za wananchi wa eneo husika au ndani ya Kata ndio maana zikaitwa jina la ‘Shule
za Kata’.
Kile ambacho wanakijiji wa Kijiji cha Kazikazi
wilaya ya Uyui mkoani Tabora na kijiji cha Mpurukasese wilaya ya Namtumbo
mkoani Ruvuma watakiamua kwa maendeleo ya shule zao nilifikiri kingekuwa
kinaachwa kwasababu hadi wanafikia hatua ya kutatua kero zao wenyewe maana yake
wameona uchelewaji wa serikali katika eneo lao.
Ziko jamii zilizofikia hatua ya kuwaajiri walimu
kwa kuwapa ‘fedha za sabuni’ ambazo ni kujitoa kwao kwa shule zao na uchungu
wao kwa watoto wao hao ungewaacha wakachangishana tu mheshimiwa maana wapo
ambao wameingia kidato cha pili lakini hata kujua nini maana fizikia
hawajui na ni shule ya Kata.
Mheshimiwa mwananchi wako naishia hapa, na
nikutake radhi kama kosa lolote ambalo utalipata kupitia kalamu yangu. Uhalisia
wa maisha kijijini ndiyo yamenisukuma kukuandikia kutokana na uhalisia wa
maisha yetu ulivyo.
No comments:
Post a Comment
Maoni yako