MIAKA 72 NA UBORA WA WAHANDISI WA KIJERUMANI PAMOJA NA WAASHI WA TANGANYIKA KIJIJINI LUNDU

NA KIZITO MPANGALA

MIAKA 72 tangu jengo hili la kiroho liliponengwa halijaleta usumbufu kiujenzi. Msingi wake ni imara. Ni mwaka 2005 pekee jengo hili liliathiriwa na kimbunga (chinangunga) ambapo ni paa pekee liliharibiwa na ni sehemu ndogo sana iliyoathiriwa. Ilikarabatiwa kwa muda mfupi na kukamilika. Boriti zake kwenye paa hata watu 10 boriti moja hawawezi kunyanyua. Huu ni uhandisi wa Wajerumani.

Tazama upande wa juu kuna msitari mweusi umenyooka ukutani hapo. Hii siyo rangi kusema kwamba imepakwa. Hayo ni matofali yaliyoiva na kuzidi viwango vya ubora, na ni ngumu kwa matofali haya kuvunjika kirahisi. Hivyo msitari huo hapo juu ni urembo tu kiujenzi.

Kuni ambazo ni bora sana kuchomea matofali ni Miyombo. Miti hii ipo katika vinasaba vilivyopo kwenye makundi mawili. Kuna Myombo ambao mara nyingi huzalisha aina fulani ya kamba (mighoyi) ambazo zina matumizi makubwa sana katika jamii ya watu wa Nyasa. Aina ya pili ni Myombo unaoitwa "Mpangala", mti huu pia ni dawa nzuri sana endapo utasumbuliwa na tumbo hasa kwa wanaoharisha. Mimi ninatumia sana dawa hii pamoja na Mwarobaini.

Kwa hiyo, aina hizi mbili za miyombo ni miti inayoweza kukua na kufikia ukubwa wa muembe. Hizi ni kuni nzuri za kuchomea matofali kwa sehemu zile ambazo matofali hupatikana kwa kuchimba udongo, kuchanganya na maji, kufyatua, kusubiri yakauke, kisha kuyapanga kwa utaalamu ambao hata kijana mwenye digrii ya uhandisi wa ujenzi hawezi kupanga kama hajakulia mazingira ya upatikanaji wa matofali kwa mchakato huu niliousema mpaka kwenye chochea kuni na kisha kuwasha moto.

Hivyo, ukuta wa jengo hilo (kanisa) pichani ni ukuta imara sana. Hata vioo vya madirishani unavyoviona vimekuwepo hapo kwa muda wa miaka 72 sasa. Hakika kutunza mali kuna faida sana. Jengo linatunzwa tena hakuna mlinzi hapo lakini mlinzi ni imani za waingiao humu kushibisha roho zao.

Sehemu ya kijani hapa chini ni aina fulani ya nyasi ambazo zilipandwa na wahandisi wakoloni wastaarabu kutoka Ujerumani. Ni nyasi ambazo hazipotezi rangi yake kwa mwaka mzima, hata nyakati za jua kali zinakuwa na kiasi fulani cha ukijani wake.

Hapa ndiyo kijijini Lundu, Wilaya ya Nyasa, Mkoani Ruvuma