MAKINIKIA YANG’OA VIGOGO WA ACACIA

NA MWANDISHI WETU

VUMBI lililosababishwa na sakata la mchanga wa madini maarufu kama MAKINIKIA limeitikisa tena kampuni ACACIA ambayo inamiliki kampuni zinazochimba madini hapa nchini katika maeneo mbalimbali kanda ya ziwa, baada ya vigogo wake wawili kulazimika kuachia ngazi mapema leo.

Kwa mujibu wa Taarifa rasmi iliyotolewa na kampuni ya ACACIA imeeleza kuwa Ofisa Mtendaji Mkuu, Brad Gordon pamoja na Meneja wa Fedha, Andrew Wray wamejiuzulu nyadhifa, lakini wataendelea kuwa wafanyakazi wa kampuni hiyo hadi mwishoni mwa mwaka huu.

“Wote wawili, Brad na Wray watabaki katika kampuni hadi mwishoni mwa mwaka katika kuhakikisha makabidhiano ya ofisi yanakamilika. Brad anarudi kwao Australia kwa masuala ya kifamilia, wakati Andrew anatafuta kazi nyingine. Kwa sasa Bodi inapenda kutangaza kuwa imewachagua Peter Geleta, ambaye alikuwa Mratibu Mkuu,  atakuwa Kaimu Ofisa Mtendaji Mkuu. Jaco Maritz, ambaye kwa sasa ni Meneja Mkuu, atakuwa Meneja wa Fedha wa kampuni. Uteuzi huo utaanza rasmi Januari 1, 2018,” ilisema taarifa ya ACACIA.